• اخر الاخبار

    الجمعة، 20 مارس، 2015

    25 نصيحة للمهاجر العربي في كندا

    كتب: هاني تادرس

    1-  اول ماتجيلك الفيزا اوعي يصور لك خيالك المشوش ان دي نهاية متاعبك (المشوار لسة طوييييل)






    2- سلم علي اهلك كويس ومتعملش عنتر وتوعدهم انك هاتيجي كل صيف





     
    3-سيب هدومك الشتوي وخصوصا بروفاراتك لان ملهاش لازمه مع برد هنا





    ٤- اطلع الساحل وشرم واخرج قد ما تقدر عشان هتعيش تفتكر الحاجات دى




    5-   حط فدماغك ان الفساد والغباوه من صفات الكائن البشري فأي مكان 



    6-   اوعي تصبر نفسك انك هتشقط الباسبور فكام سنه فالسريع وراجع


    ٧) تأكد تماماً انك لما توصل متتصلش بأهلك ومعارفك هنا طلبا للمساعده


    8-  حاول تقرا كويس كل ورقه بتحط توقيعك عليها واتاكد انك فاهم محتواها


      ٩- سيب تاريخك المهني والعائلي والاجتماعي فشقة مصر وتغطيه من التراب 


    ١٠- لا تفتح اي حديث من اي نوع مع جارك فالطائرة وخصوصا لو كان بلدياتك



    ١١- لا تتوقع ان اي حد هيفهم هزارك وقفشاتك لانها هتبقي رخمة لما تترجمها


    ١٢- لا تتطوع بإعطاء اي تفاصيل اكثر من المطلوب للإجابة علي اي سؤال 

    13- مفيش داعي خالص لأي دقات شهامة مصرية وخصوصا التي تظهر مع الستات

    ١5-انسي ال ٤٠ واحد اللي كانوا بيساعدوك فطلباتك زمان ساعد نفسك يا خفيف

    ١٦- حال وصولك ضع جينات الفهلوه جانبا واسأل وافهم كل حاجه قبل ما تعملها

    ١٧- درب نفسك علي التركيز علي الاخبار السيئه ببلدك عشان تفضل مقتنع انك عملت الصح 

    ١٨- لو حد من ولادك سالك احنا جينا هنا ليه اوعي تقوله الحقيقه قوله هنا مستقبل أحسن 



    ١٩- اقنع نفسك ان اللي بيحصل فيك هنا أهون بكتير من التحرش في العيد فوسط البلد 

    ٢٠) لا تنخدع في الأسماء الكبيرة محلات ومطاعم وخلافه دول نصابين تعامل مع الأفراد 

    ٢١) متاجرش بيت ومتشتغلش ومتشاركش بلدياتك ولا تطلب نصيحته لانه بيستمتع بتوريطك

    ٢٢) تأكد ان كل حاجه هنا قابله للنقاش والفصال والمناهده بس اعرف الطريقة

    ٢٣) تذكر القاعدة الذهبية "انت عندك ام واحده" وهي مش هنا فاعتمد علي نفسك

    ٢٤) أتعلم الدرس وابقي ابحث بنفسك عن التفاصيل قبل ما تعمل أي خطوة فحياتك


    ٢٥- وأخيرا افتكر كويس الشخص اللي أقنعك وزن عليك فالهجرة لأنك هتعوزه بعد فتره



    طبعا انت مخدتش بالك ان النصيحه رقم 15 مش موجوده –عدم دقة ملاحظه عاده مصريه اصيله-
    مع اني قلت لك اقرا كل ورقه كويس ودقق في التفاصيل
    ....
    ....
    ....
    دلوقتي انا عارف انك عملت scroll up عشان تتأكد من كلامي –عدم الثقه بردوعاده مصريه اصيله-

    عزيزي المهاجر اهلا بيك في ارض الاحلام, استمتع بأقامتك هنا



    اذا أعجبك هذا المحتوي فاشترك ليصلك منا كل جديد

    • تعليقات بلوجر
    • تعليقات الفيس بوك

    0 التعليقات:

    إرسال تعليق

    Item Reviewed: 25 نصيحة للمهاجر العربي في كندا Rating: 5 Reviewed By: كندا بالعربي
    /